Tækni og umhverfissvið

Tækni- og umhverfissvið hefur umsjón með öllum verklegum framkvæmdum bæjarins, annast undirbúning framkvæmda, gerð kostnaðaráætlana og framkvæmdaeftirlit.

Helstu verkefni ársins 2017 á tækni- og umhverfissviði

Tækni- og umhverfissvið hefur umsjón með öllum verklegum framkvæmdum bæjarins, annast undirbúning framkvæmda, gerð kostnaðaráætlana og framkvæmdaeftirlit. Sviðið annast rekstur fasteigna bæjarins og byggingareftirlit vegna nýbygginga. Undir sviðið heyra embætti skipulagsstjóra, byggingarfulltrúa, vatnsveita, fráveita og garðyrkjudeild ásamt þjónustumiðstöð bæjarins. Umhverfismál, umferðaröryggismál og rekstur gatna, gangstétta og stígakerfis heyra einnig undir sviðið.

Forstöðumaður sviðsins er Eysteinn Haraldsson bæjarverkfræðingur.

Framkvæmdir:

Stærsta einstaka framkvæmd ársins hjá Garðabæ voru endurbætur á sundlauginni í Ásgarði og rýmum innandyra.
Nýir æfingavellir með gervigrasi voru byggðir við Ásgarð.
Framkvæmdum við uppsteypu 1. áfanga Urriðaholtsskóla lauk í byrjun árs 2017. Fyrsti áfangi er 5700 fermetrar að stærð.
Í maí var lokið við síðari áfanga í uppbyggingu nýrrar göngu- og hjólaleiðar milli byggðar og friðlands Vífilsstaðavatns þegar stígurinn var malbikaður. Stígurinn liggur sunnan Vífilsstaða meðfram votlendi Vífilsstaðalækjar og Vatnsmýrar sem er affall Vífilsstaðavatns og hæðanna í kring.
Endurbætur fóru fram á skólahúsnæði í Lundabóli, Garðaskóla og Flataskóla.
Hraðhleðslustöð fyrir rafbíla opnaði í bílakjallaranum á Garðatorgi í miðbæ Garðabæjar 11. október. Garðabær var fyrst sveitarfélaga til að semja við aðila á einkamarkaði um uppsetningu hraðhleðslustöðvar.

Skipulagsmál:

Niðurstöður úr framkvæmdasamkeppni um deiliskipulag fyrir miðsvæði Álftaness voru kynntar 15. júní 2017. Á árinu 2017 var unnið að deiliskipulagi með vinningshöfum sem nú er komið í forkynningu.
Bæjarstjórn Garðabæjar samþykkti á fundi sínum 6. apríl 2017 að leggja fram tillögu til mennta- og menningarráðherra um að Garðahverfi yrði gert að verndarsvæði í byggð , sbr. 4. gr. laga um verndarsvæði í byggð nr. 87/2015. Tillagan var staðfest af mennta- og menningarmálaráðherra í lok október.
Tillaga að aðalskipulagi Garðabæjar 2016-2030 ásamt umhverfisskýrslu var auglýst 8. maí 2017 samkvæmt 31. gr. skipulagslaga nr. 123/2010. Nýtt aðalskipulag Garðabæjar var staðfest í bæjarstjórn Garðabæjar 6. október 2017 og það var svo staðfest í apríl 2018.
Á árinu 2017 var efnt til framkvæmdasamkeppni um tillögu að rammaskipulagi Vífilsstaðalands. Í desember voru kynnt úrslit úr samkeppninn i og nú er unnið að mótun tillögu að rammaskipulagi svæðisins í samvinnu við vinningshafa.
Deiliskipulag Heiðmerkur og Sandahlíðar var samþykkt í lok árs 2017.

Umhverfismál:

Samstarfssamningur Garðabæjar við Skógræktarfélag Garðabæjar var undirritaður 13. mars 2017 þar sem kveðið er á um víðtæka samvinnu um ræktun og umhirðu á svæðum sem skilgreind eru sem skógræktarsvæði og eru utan Heiðmerkur.
Framkvæmd við endurheimt votlendis á Álftanesi milli Kasthúsatjarnar og Jörvavegar lauk á fyrri hluta ársins 2017 en verkefnið hófst í ágúst 2016.
E ndurskoðuð umhverfisstefna Garðabæjar var samþykkt í bæjarstjórn Garðabæjar á vorönn 2017 .
Mjög góð þátttaka var í hinu árlega hreinsunarátaki bæjarins í apríl 2017 þar sem félög, hópar og nágrannar voru hvattir til að taka sig saman og hreinsa sitt nærumhverfi.