Helstu verkefni fræðslu- og menningarsviðs

Helstu verkefni 2017

Skólamál:

• Á vorönn 2017 var úthlutað styrkjum úr þróunarsjóðum leik- og grunnskóla.  Alls hlutu 23 verkefni styrk úr þróunarsjóði grunnskóla og 14 verkefni hlutu styrk úr þróunarsjóði leikskóla.

• Ásta Kristín Valgarðsdóttir tók við starfi leikskólastjóra á leikskólanum Kirkjubóli 1. ágúst.

• Við upphaf skólaárs haustið 2017 voru alls rúmlega 2500 börn í 1.-10. bekk í Garðabæ þar af um 210 börn í 1. bekk.  Að auki  voru um 70 börn í 5 ára bekkjum í Flataskóla og í Barnaskóla Hjallastefnunnar að Vífilsstöðum.  Yfir 800 börn voru alls í leikskólum í Garðabæ.

• Bæjarráð Garðabæjar samþykkti í ágúst að greiða fyrir þau námsgögn sem nemendur í grunnskólum bæjarins nota í starfi skólanna .

• Forvarnavika var haldin í leik- og grunnskólum Garðabæjar í október.   Þema vikunnar var snjalltækjanotkun, líðan og svefn. 

• Öll skólastig í Garðabæ hlutu styrk í flokki fjölþjóðlegra samstarfsverkefna Erasmus+ árið 2017 .  Erasmus+ er styrkjaáætlun Evrópusambandsins fyrir mennta-, æskulýðs- og íþróttamál 2014-2020.  

• Hofsstaðaskóli varð 40 ára á árinu. Af því tilefni var haldin afmælishátíð í skólanum föstudaginn 1. september  en þá var hefðbundin stundaskrá lögð til hliðar og nemendur og starfsfólk gerði sér glaðan dag.

• Þorgerður Anna Arnardóttir var ráðin í starf skólastjóra Urriðaholtsskóla 27. október.

• Kennarar og annað starfsfólk í leik- og grunnskólum Garðabæjar kom saman á sérstökum menntadegi sem var haldinn á starfsdegi skólanna föstudaginn 27. október. Á menntadegi voru flutt 24 erindi sem fjölluðu um verkefni sem hafa hlotið styrki úr þróunarsjóðum leik- og grunnskóla í Garðabæ.

• Flataskóli fékk í nóvember, á alþjóðlegum degi barna, viðurkenningu fyrir að vera annar af fyrstu tveimur skólunum á Íslandi til að fá titilinn réttindaskóli UNICEF.   Einnig hlaut frístundaheimili Flataskóla, Krakkakot, viðurkenningu frístundaheimila. 

Menning:

• Garðabær tók þátt í Vetrarhátíð á höfuðborgarsvæðinu 2.-5. febrúar og bauð upp á dagskrá á Safnanótt og Sundlauganótt.    

• Blásarasveitir Tónlistarskóla Garðabæjar fögnuðu 50 ára starfsafmæli sínu á árinu. Í tilefni þess héldu þær afmælistónleika í Vídalínskirkju laugardaginn 18. mars.

• Jazzhátíð Garðabæjar var haldin í tólfta sinn dagana 20.-22. apríl 2017.

• Sigríður Sigurjónsdóttir var ráðin í starf forstöðumanns Hönnunarsafns Íslands í apríl.  

• Árleg Jónsmessugleði Grósku í samstarfi við Garðabæ var haldin fimmtudagskvöldið 22. júní á göngustígnum við strandlengjuna í Sjálandshverfinu.

• Pétur Jóhann Sigfússon var útnefndur bæjarlistamaður Garðabæjar árið 2017.

• Hin árlega Tónlistarveisla í skammdeginu var haldin 9. nóvember sl . á Garðatorgi þegar hlómsveitin Moses Hightower steig á svið. 

• Farið var í fjölmargar sögugöngur á árinu og var góð þátttaka í þeim öllum. Garðabær tók einnig þátt í lýðheilsugönguverkefni Ferðafélags Íslands í september 2017.

Íþróttamál:

• Íþróttamenn Garðabæjar árið 2017 voru Andrea Sif Pétursdóttir fimleikakona úr Stjörnunni og Pétur Fannar Gunnarsson dansari í Dansfélagi Reykjavíkur. Þá var meistaraflokkur kvenna í hópfimleikum hjá Stjörnunni valinn lið ársins og Halldór Ragnar Emilsson þjálfari í knattspyrnudeild Stjörnunnar þjálfari ársins.

• Ný hjólabraut á skólasvæðinu á milli Garðaskóla og Flataskóla var formlega tekin í notkun fimmtudaginn 30. mars 2017.

• Laugardaginn 13. maí 2017 var undirritaður samstarfssamningur milli Garðabæjar og Ungmennafélags Álftaness (UMFÁ) um rekstur og eftirlit með vallarsvæðinu á Álftanesi.

• Undirbúningur að nýju fjölnota íþróttahúsi hélt áfram á árinu. Í desember var auglýst eftir umsóknum um þátttöku í alútboði vegna hönnunar og byggingar á fjölnota íþróttahúsi í landi Vífilsstaða.